ಕಾಲ ಬದಲಾಗುತ್ತದೆ

ಹೌದು, ಕಾಲ ಬದಲಾಗುತ್ತದೆ

ಆಗುತ್ತಲೇ ಇರುತ್ತದೆ

ಯಾರ ಹಂಗೂ ಇಲ್ಲದೇ

ಯಾರ ಕಾಯುವಿಕೆಗೂ ದಾಖಲಾಗದೇ

ಅನಂತತೆಯಲ್ಲಿ

ಕಾಲದ ಪರೀಧಿಯೊಳಗಿನ

ವರ್ತುಲದಂತೆ.

ನೀನು ಬದಲಾಗಲಾರೆ

ಅಂತೆ ಕಂತೆಗಳೆಲ್ಲ ಹುಸಿಯಾದವು

ಎಷ್ಟು ಬದಲಾಗಿ ಬಿಟ್ಟೆ ಗೆಳೆಯ

ನನ್ನ ಅಳಲು ನಿನ್ನ ತಟ್ಟಲಿಲ್ಲ

ನನ್ನ ಕನಲು ನಿನ್ನ ಕರಗಿಸಲಿಲ್ಲ.

ಏನೆಲ್ಲ ಕನಸುಗಳ ಚುಕ್ಕೆಗಳನ್ನಿಟ್ಟಿದ್ದೆ

ನೀಲಿಯಗಸದ ತುಂಬೆಲ್ಲ ನಿನ್ನ ನಗು

ಬೆಳದಿಂಗಳುಕ್ಕಿಸುವ ತಂಪಿನಲ್ಲಿ

ನಿನ್ನ ದನಿಯನಷ್ಟೇ ಆಲಿಸಿದ್ದೇ

ನನ್ನ ದನಿಗೆ ಕೊರಳಾಗಲಿಲ್ಲ ನೀನು

ನಿನಗೆ ನಿನ್ನದೇ ಜಂಜಾಟ ನೂರು

ಕನಸುಗಳಾಗಿವೆ ಸಾವಿರ ಚೂರು

ಯಾವ ನಾಳೆಗಳಿಗೆ ಕಾಯಲಿ ಇನ್ನು

ನೀನೆಲ್ಲೋ ನಾನೆಲ್ಲೋ ಬದುಕೆಣಿಸಿದತ್ತ

ಹಾದಿ ಬೇರೆಯಾಗುವ ಕಾಲ ಕಾದಿದೆಯೇನೋ

ಬರುವ ಸುದಿನವ ಎಣಿಸಿ ಕೂರುವ ಕತ್ತಲಲ್ಲಿ

ಆ ಚಂದಿರ ಮೂಡುವನೋ ಈ ರಾತ್ರಿಗೆ

ಕಣ್ಣಾಗಿ ಮುಗಿಲಿಗೆ ಹಗಲಾಗಿ.